Policia greke ka arrestuar shtetasin shqiptar Spiro M., 60 vjeç,për shkak se akuzohet për vrasjen e një pacienti me koronavirus.

Krimi i rëndë ndodhi mesnatën e 7 prillit. Dyshohet se Spiro.M. ,i hoqi aparatin respirator një 76-vjeçari grek me inicialet E. S. I moshuari ishte i intubuar me koronavirus, ndërsa shqiptari, i shqetësuar nga zhurma e aparatit, ja heq, duke i shkaktuar vdekjen.

Arrestimi i shqiptarit u bë pasi ai u shërua nga covid. Pasi u rikuperua, i kërkoi falje hetuesit, por u la në paraburgim.

Sipas mediave greke 60-vjeçari ka deklaruar se nuk ka lidhje me çështjen. Në deklaratën e tij, ai është shprehur se ka qenë në gjumë dhe nuk e dinte se çfarë kishte ndodhur. Deklaratat e tij nuk kanë rezultuar bindëse, pasi nga hetimet ka rezultuar se në aparat ishin gjetur gjurmët gishtërinjve të shqiptarit.

Kontrolluesit mjekësorë, të cilët kryen autopsinë, sipas informacionit, zbuluan se viktima kishte pneumoni, ndërsa nuk u zbuluan dëmtime në trupin e tij.