Dy persona kanë rënë në prangat e Policisë së Durrësit në kuadër të dy operacioneve të koduara “Rada” dhe “Bashkëpunëtori”, të zhvilluara për zbardhjen e rasteve të grabitjeve me armë dhe me dhunë.

Sipas policisë, në operacionin “Rada” u arrestua 21-vjeçari me inicialet M.F., banues në Fushë-Krujë, i cili dyshohet se më 19 qershor, i maskuar dhe i armatosur me armë automatike, ka hyrë në oborrin e një banese në fshatin Radë me qëllim vjedhjen.

I riu u kap teksa tentonte të largohej nga zona, ndërsa gjatë kontrollit të ushtruar në banesën e tij, uniformat blu gjetën dhe sekuestruan dy armë zjarri, të cilat do t’i nënshtrohen ekspertizës.

Ndërkohë, në operacionin “Bashkëpunëtori”, policia ndaloi shtetasin R.K., 51 vjeç, banues në Tiranë, i dyshuar për përfshirje në dy grabitje me dhunë të kryera në bashkëpunim me një person tjetër, i cili ishte arrestuar më herët.

Sipas hetimeve, 51-vjeçari dyshohet se ka marrë pjesë në grabitjen e dy qytetarëve në fshatin Shënvlash dhe në zonën e Aeroporti i Rinasit.

Policia bën me dije se identifikimi i tij u mundësua pas analizimit të pamjeve filmike dhe veprimeve hetimore, të cilat dokumentuan përfshirjen e tij në ngjarje.

Materialet procedurale i janë referuar Prokurorisë së Durrësit për veprime të mëtejshme, ndërsa hetimet vijojnë për të zbardhur plotësisht rrethanat dhe për të verifikuar nëse të arrestuarit janë të përfshirë edhe në ngjarje të tjera kriminale.