IBIZA – Ishulli i famshëm për jetën e natës dhe ujërat kristal tërheqës është vënë në alarm nga një emergjencë ekologjike që po trondit banorët dhe turistët: gjarpërinj gjigantë, deri në 1.8 metra të gjatë, po notojnë në bregdet dhe po kolonizojnë gjithnjë e më shumë zona të egra të ishullit.

Pamjet e fundit të këtyre zvarranikëve në det kanë shkaktuar panik mes pushuesve, disa prej të cilëve kanë anuluar pushimet. Portale të njohura ndërkombëtare si La Repubblica raportojnë se turistët po shprehen se janë “shumë të tmerruar për të notuar”.

Por sipas ekspertëve, pas këtij fenomeni qëndron një krizë më e thellë ekologjike. Gjarpri i barit (Hemorrhois hippocrepis), një specie vendase në Spanjën kontinentale dhe Afrikën e Veriut, u soll pa dashje në Ibiza në fillim të viteve 2000, së bashku me rrënjët e pemëve të ullirit të importuara. Mungesa e grabitqarëve natyrorë dhe prania e shumtë e hardhucave vendase kanë bërë që ata të shumohen në mënyrë të shfrenuar.

“T’i shihje në det ishte një tronditje. Nuk e prisnim kurrë që të bëheshin notarë kaq të mirë,” thotë Víctor Colomar nga Konsorciumi për Mbrojtjen e Jetës së Egër në Ishujt Baleare.

Fenomeni nuk është vetëm i kufizuar në numër: gjarpërinjtë po bëhen gjithnjë e më të mëdhenj. Rekordi i deritanishëm: një individ i gjatë 1.83 metra, krahasuar me një gjatësi mesatare prej vetëm 89 cm. Shkencëtarët shpjegojnë se mungesa e rivalëve dhe bollëku i ushqimit po nxit një proces të ashtuquajtur gjigantizëm ekologjik, që përkeqëson më tej problemin.

Sot, nga Portinatx deri në ishujt Espartar, gjarpërinjtë po zhvendosin faunën vendase dhe ndryshojnë peizazhin natyror të Ibizës. Autoritetet dhe organizatat mjedisore janë në kërkim të zgjidhjeve për të ndalur këtë pushtim të pazakontë që kërcënon jo vetëm ekosistemin, por edhe turizmin, arterien kryesore të ekonomisë së ishullit.