Një ngjarje tronditëse ka tronditur opinionin publik në Brazil, ku një fëmijë 2-vjeçar qëlloi për vdekje nënën e tij 27-vjeçare, Deborah Rodriguez Monteiro, me armën e babait të tij, një pistoletë Glock 9 mm.

Ngjarja u regjistrua nga një kamera sigurie në banesën e familjes. Në pamje shihet vogëlushi teksa merr armën nga tavolina, e shikon për disa sekonda, dhe në një moment të papritur tërheq këmbëzën, pikërisht në çastin kur nëna e tij kthehet drejt tij. Plumbat e goditën në gjoks dhe krah, duke i shkaktuar plagë fatale.

Prindërit ishin të përfshirë në një bisedë dhe nuk e vunë re fëmijën derisa ndodhi e keqja. Sipas raportimeve, burri i saj ndërhyri menjëherë, mori armën dhe u përpoq të ndihmonte gruan, por ishte tepër vonë. Ajo u transportua me urgjencë në spital, por ndërroi jetë pak minuta më vonë.

Sipas inspektorit të policisë, Daniel Felismino, babai kishte leje për armëmbajtje, por mungesa e sigurisë në ruajtjen e armës është në qendër të hetimeve. Policia po shqyrton akuzat për neglizhencë të rëndë, pasi arma ndodhej në një vend lehtësisht të aksesueshëm për një fëmijë.

Kjo tragjedi ka nxitur debat të fortë në opinionin publik dhe mediat braziliane, për përgjegjësinë e prindërve në ruajtjen e armëve në ambiente ku ndodhen fëmijë, dhe ka rikthyer në vëmendje nevojën për masa më të forta ligjore për sigurinë e armëve në shtëpi.