Në një deklaratë për mediat sot, Ilda Zhulali, drejtuesja e Departamentit të Politikës së Jashtme në Partinë Demokratike, kritikoi ashpër nivelin e drejtësisë në Shqipëri. Ajo vuri në dukje se, sipas raportit të fundit të World Justice Project, Shqipëria ka mbetur mbrapa edhe krahasuar me vende si Vietnami dhe Kosova sa i përket disa treguesve kyç të sundimit të ligjit dhe drejtësisë.
Zhulali tha se Shqipëria renditet në vendin e 106 për ndërhyrjen e qeverisë në drejtësinë penale, ndërsa Vietnami në vendin e 98 dhe Kosova në vendin e 65. “World Justice Project, autoriteti ndërkombëtar që mat sundimin e ligjit në 142 vende, na ka renditur nën Vietnamin komunist, ndërsa Shqipëria e shekullit 21 dhe aspirant për Bashkimin Europian përballet me sfida serioze në drejtësi,” tha ajo.
Duke përmendur renditjet e Shqipërisë në aspekte të ndryshme të drejtësisë, Zhulali tregoi se Shqipëria është pozicionuar në vendin e 107 për nivelin e korrupsionit, ndërsa Kosova qëndron e 65-ta dhe Kolumbia e 100-ta. Po ashtu, për lirinë e shprehjes, Shqipëria është renditur në vendin e 92-të, ndërsa Kosova e 60-ta. Sa i përket të drejtës për protestë dhe aktivizmit politik, Shqipëria qëndron në vendin e 102, krahasuar me Kosovën në vendin e 60 dhe Serbinë në vendin e 93.
Gjithashtu, Zhulali vuri në dukje se Shqipëria është në vendin e 114 për nivelin e zbatimit të ligjit, ndërsa Bjellorusia është renditur më mirë në vendin e 108 dhe Kosova në vendin e 82. Ajo shtoi se Shqipëria qëndron në vendin e 128 për proceset e rregullta administrative dhe në vendin e 101 për respektimin e të drejtave civile, nën Vietnamit komunist që qëndron në vendin e 96 dhe Kosovën në vendin e 89.
Sipas Zhulalit, raporti i World Justice Project është një tjetër dëshmi e “dështimit të plotë të reformës në drejtësi dhe të përpjekjeve për një sistem të pavarur”. Ajo theksoi se “kontrolli i fortë politik i Kryeministrit Edi Rama mbi drejtësinë ka sjellë një sistem që bie ndesh me standardet demokratike dhe ka vendosur Shqipërinë nën hijen e shteteve me regjime autoritare”.
