Në një mesazh për 20-vjetorin e themelimit të Partisë së Lirisë, dikur Lëvizja Socialiste për Integrim, Ilir Meta ka falënderuar anëtarët dhe simpatizantët e partisë për kontributin e tyre. Ai ka përmendur figurat historike të partisë që nuk janë më dhe ka theksuar rëndësinë e këtij rrugëtimi në jetën politike të vendit. Meta ka vlerësuar rolin e partisë në përshpejtimin e proceseve të integrimit europian, por ka kritikuar momentin e “shitjes së mandateve”, një referencë indirekte për gruan e tij, Monika Kryemadhin, që drejtoi partinë më pas.
Në mesazhin e tij, Meta ka theksuar se partia hapi një faqe të re dhe bëri përparime të rëndësishme, por gjithashtu ka përmendur se Konventa e 27 prillit shënoi fundin e “nepotizmit dhe korrupsionit”. Ky ngjarje, sipas tij, ishte një pikë kthesë e rëndësishme që solli edhe ndarjen e tij nga Kryemadhi, pasi ai e largoji atë nga strukturat e partisë.
Ndërkohë, në këtë përvjetor, Meta ka zgjedhur të mos përmend me emër Monika Kryemadhin, me të cilën është në proces divorci, por ka pasur një mesazh të qartë kritik ndaj periudhës që pasoi pas largimit të tij nga drejtimi i partisë.
Mirëmëngjes të gjithë anëtarëve dhe simpatizantëve të Partisë së Lirisë! Mirëmëngjes dhe përqafime të gjithë themeluesve, 20 vite më parë, të Lëvizjes Socialiste për Integrim, që hapi një faqe të re në jetën politike të vendit, që ndihmoi aq shumë për zhbllokimin e proceseve të integrimit europian dhe garantoi dy rotacione demokratike në vend, si dhe imponoi shumë reforma që i shërbyen vendit për integrimin europian.
Mirënjohje të përjetshme për të gjithë ata që nuk jetojnë më dhe që dhanë kontributet e tyre më të çmuara në këtë themelim, për Afërdita Tutulanin, motrën e Heronjve të Popullit Margarita dhe Kristaq Tutulani, për Profesor Syrja Hysin, një personalitet i jashtëzakonshëm nga një familje patriotike brez pas brezi, për ish-Gjeneral Veli Llakën, një personalitet i madh i ushtrisë shqiptare dhe patriot i vërtetë, si edhe për shumë e shumë të tjerë.
Një përshëndetje të veçantë për të gjithë ata që u detyruan të largohen nga vendi, por që mendjen dhe zemrën e kanë këtu dhe që kanë nisur të organizohen fort për realizimin e programit tonë të 5 Prioriteteve madhore për Shqipërinë me 4 milion shqiptarë plus.
Një keqardhje për të gjithë ata që e nisën si idealistë dhe përfunduan si patronazhistë dhe patronazhiste. Dhjetëra bien (blihen), mijëra ngrihen! Unë personalisht jam 20 herë më i ri se 20 vite më parë dhe 20 herë më i fortë se 20 vite më parë.
Konventa historike e 27 Prillit ishte një moment madhor për t’u ndarë njëherë e përgjithmonë me nepotizmin, me korrupsionin, me imoralitetin dhe për të vendosur njëherë e përgjithmonë integritetin, transparencën dhe meritokracinë si shtyllat që do të jenë garante për jetëgjatësinë dhe suksesin e Partisë së Lirisë shumë shpejt dhe për dekadat që do të vijnë!
Shqipëria me 5 Prioritetet tona do të bëhet me 4 milionë shqiptarë plus shumë shpejt dhe për këtë duhet të kontribuojmë të gjithë.
