Një 38-vjeçar shqiptar ka shkaktuar një situatë të pazakontë dhe shqetësuese për policinë italiane dhe ish-bashkëshorten e tij. Gruaja, 32 vjeç, kishte urdhër mbrojtjeje ndaj tij, ndërsa shqiptari ishte pajisur me një byzylyk gjurmues për të garantuar sigurinë e saj.

Në përpjekje për t’i dërguar një mesazh ish-bashkëshortes, 38-vjeçari ka hequr pajisjen gjurmuese dhe ia ka dorëzuar vajzës së tij adoleshente, duke i kërkuar që t’ia çonte të ëmës. Kur vajza arriti në banesën e saj me pajisjen, policia u alarmua nga vendndodhja e papritur e byzylykut dhe hyri menjëherë në shtëpi, pa gjetur aty 38-vjeçarin.

Pasi u sqarua situata, autoritetet italiane kryen kontrolle në shtëpinë e burrit dhe e gjetën atë në gjendje të rënduar emocionale dhe nën efektin e alkoolit. Pas këtij incidenti, ai u arrestua menjëherë nga policia.