Autoritetet australiane kanë arrestuar një influencere 34-vjeçare nga Queensland, e cila akuzohet për helmimin e vajzës së saj njëvjeçare për të mbledhur donacione dhe për të rritur ndjekësit në rrjetet sociale. Gruaja pretendonte publikisht se vajza e saj vuante nga një “sëmundje kronike,” duke publikuar video të fëmijës në gjendje të rënduar shëndetësore për të tërhequr më shumë mbështetje financiare dhe emocionale.

Hetimet zbuluan se që nga gushti, 34-vjeçarja i kishte dhënë vajzës së saj ilaçe dhe substanca pa recetë, duke shkaktuar që vogëlushja të shtrohej në spital tetorin e kaluar. Policia konfirmoi se disa nga ilaçet e përdorura ishin për një person tjetër që jetonte në të njëjtën shtëpi.

Në periudhën kur vajza ishte e sëmurë, influencierja arriti të mblidhte mbi 37 mijë dollarë përmes një fushate në platformën GoFundMe. Tani ajo përballet me akuza për abuzim, shfrytëzim të të miturit dhe mashtrim.

Ngjarja ka tronditur komunitetin, duke ngritur shqetësime të mëdha mbi përdorimin e rrjeteve sociale dhe abuzimin me ndjenjat e njerëzve për përfitime personale.