Artan Lame, ish-drejtor i Agjencisë Shtetërore të Kadastrës dhe figurë e njohur publike, do të përcillet sot në banesën e fundit. Homazhet do të zhvillohen në sallën “Libri Enciklopedik” të Akademisë së Shkencave, duke filluar nga ora 10:00, ndërsa varrimi do të bëhet në orën 12:00 në varrezat e Sharrës, Tiranë.

Familja Lame ka njoftuar se pritjet për nder të tij do të vazhdojnë edhe të mërkurën dhe të enjtjen në oraret 09:30–13:00 dhe 17:00–20:30 pranë agjencisë funerale “Alba 2000” në Rrugën e Durrësit (ish-ambasada jugosllave).

Artan Lame ndërroi jetë në moshën 58-vjeçare në Gjermani, pas një ndërhyrjeje të vështirë në zemër dhe qëndrimi në gjendje kome. Ai ishte një figurë e njohur në administratën shqiptare, duke mbajtur poste të rëndësishme si zëvendësministër, drejtor i Trashëgimisë Kulturore, nënkryetar i Bashkisë Tiranë dhe drejtor i ALUIZNI-t.

Lame ishte gjithashtu publicist, studiues i historisë shqiptare dhe aktiv në mbrojtjen e trashëgimisë kulturore. Për veprimtarinë e tij u dekorua me “Medaljen e Mirënjohjes” nga Presidenti i Republikës në vitin 2012, në kuadër të 100-vjetorit të Pavarësisë së Shqipërisë.