Një aksident tragjik ndodhi më 18 gusht në plazhin e Velipojës, ku humbi jetën një 19-vjeçar italian. Ngjarja ka shkaktuar një reagim të fuqishëm nga e dashura e viktimës, Giusy Di Tella, e cila ishte e pranishme në momentin e aksidentit bashkë me të vëllanë.

Sipas informacioneve, 19-vjeçari kishte ardhur për pushime në Shqipëri me të dashurën e tij dhe vëllain e saj, por humbi jetën në plazhin e Velipojës. Pas ngjarjes, u arrestua vëllai i të dashurës së viktimës.

Giusy Di Tella, e cila gjithashtu është motra e të arrestuarit Salvatore Di Tella, tha se ata nuk kishin qenë nën efektin e alkoolit apo drogës, duke e quajtur ngjarjen një aksident tragjik dhe një përplasje të papritur. Ajo theksoi se autoritetet shqiptare kishin lëshuar trupin e të dashurit të saj dhe se ata po përgatiteshin për të kthyer trupin në Itali.

“Unë, i fejuari im dhe vëllai im kemi qenë gjithmonë shumë të lidhur bashkë,” shpjegoi Giusy. Ajo mbrojti vëllain e saj Salvatore, duke pretenduar se ai nuk kishte asnjë faj dhe akuzoi policinë për një version të gabuar të ngjarjes. Sipas saj, dy jet ski-të ishin larg njëra-tjetrës dhe ata nuk kishin qenë aq larg bregut, ndryshe nga sa është raportuar.

Giusy Di Tella tha se ajo po xhironte një video me celularin kur ndodhi përplasja në anën e djathtë të jet ski-së së tyre. Salvatore Di Tella kishte hedhur menjëherë në det për të shpëtuar Nicolan dhe e kishte nxjerrë trupin në breg, ku më pas ishte transportuar në spital, por nuk arriti të mbijetonte.

“Por dua të ritheksoj se ishte thjesht një aksident tragjik. Vëllai im nuk kishte asnjë faj, madje edhe familja e të dashurit tim thotë pikërisht këtë,” shtoi ajo. “Këtu, në Shqipëri, ata domosdoshmërisht duan të gjejnë një fajtor, dhe kjo është arsyeja pse ne kërkojmë ndihmë nga autoritetet italiane,” përfundoi Giusy.