Italia ka ndërmarrë masa të reja kufitare ndaj Spanjës, pas rritjes së shqetësimeve për flukset migratore dhe sigurinë e hapësirës Shengen.

Ministria e Brendshme italiane ka vendosur mbylljen e kufijve ajrorë dhe detarë me Spanjën, pas situatës së krijuar në enklavën spanjolle të Ceutës, ku mijëra emigrantë kanë hyrë nga territori i Marokut.

Vendimi u mor pas një analize të zhvilluar nga Komiteti për Analizën e Emigracionit dhe Sigurisë së Kufijve, i drejtuar nga ministri i Brendshëm italian, Matteo Piantedosi.

Sipas autoriteteve italiane, masat synojnë forcimin e kontrollit të kufijve të jashtëm të Bashkimit Evropian dhe parandalimin e lëvizjeve të parregullta brenda zonës Shengen.

Në kuadër të rritjes së sigurisë kufitare, Piantedosi zhvilloi gjithashtu një bisedë me homologun francez, Laurent Nuñez, ku u ra dakord për shtimin e kontrolleve në kufirin tokësor mes Italisë dhe Francës, përmes mekanizmave ekzistues të bashkëpunimit policor.

Kriza në Ceuta ka rikthyer në qendër të debatit europian çështjen e menaxhimit të migracionit dhe funksionimit të zonës Shengen, ndërsa disa vende kërkojnë masa më të forta për kontrollin e lëvizjeve brenda hapësirës së lirë europiane.