Aeroplanët luftarakë izraelitë kanë kryer sulme ajrore në Rripin e Gazës mbrëmjen e së martës, pas urdhrit të kryeministrit Benjamin Netanyahu për “sulme të fuqishme” ndaj objektivave të Hamasit.

Sipas autoriteteve lokale shëndetësore, të paktën tetë persona kanë humbur jetën, përfshirë tre në lagjen Sabra të Qytetit të Gazës dhe pesë të tjerë që ndodheshin në një automjet të goditur në Han Junis.

Ky është shpërthimi më i fundit i dhunës që prej vendosjes së armëpushimit të brishtë tri javë më parë. Ushtria izraelite ende nuk ka bërë një deklaratë zyrtare për bombardimet.

Më herët, zyra e kryeministrit Netanyahu njoftoi se ai kishte urdhëruar sulme të menjëhershme, pa dhënë detaje shtesë. Një zyrtar ushtarak izraelit deklaroi se Hamas kishte shkelur armëpushimin duke kryer një sulm ndaj forcave izraelite në një zonë të enklavës nën kontrollin e Tel Avivit.

“Kjo është një tjetër shkelje e hapur e armëpushimit,” – tha zyrtari izraelit.

Hamasi, i cili kontrollon Rripin e Gazës, është shpallur organizatë terroriste nga Shtetet e Bashkuara, Bashkimi Europian dhe disa fuqi të tjera ndërkombëtare.