Ish-zv/drejtoresha e Agjencisë Kombëtare të Shoqërisë së Informacionit (AKSHI), Hava Delibashi, ka paraqitur kërkesë për zëvendësimin e masës së sigurisë nga arrest në shtëpi me një masë më të butë, duke u bazuar në faktin se ndodhet në muajin e katërt të shtatzënisë.

Aktualisht, Delibashi ndodhet nën masën “arrest në shtëpi” dhe është pjesë e të njëjtës dosje hetimore ku përfshihen edhe Ergys Agasi dhe Ermal Beqiri. Hetimi lidhet me operacionin e SPAK, që goditi një grup të dyshuar kriminal brenda AKSHI-së, lidhur me abuzime në tendera.

Gjykata i ka kërkuar informacion Prokurorisë së Posaçme Kundër Korrupsionit dhe Krimit të Organizuar (SPAK) për të mundësuar shqyrtimin e kërkesës së saj. Në këtë operacion, Ergys Agasi dhe Ermal Beqiri janë shpallur në kërkim, ndërsa masa ndaj Mirlinda Karçanaj, e cila është bashkë me Delibashin, u vendos më 18 dhjetor 2025.

SPAK vijon hetimet për të gjithë të përfshirët, ndërsa vendimi për kërkesën e Delibashit pritet të shpallet së shpejti.