Zëvendëspresidenti amerikan JD Vance ka dhënë një mesazh të qartë nga Konferenca e Sigurisë në Mynih, duke kritikuar ashpër censurën politike dhe përndjekjen e opozitës në vendet demokratike.

“Ju nuk mund të fitoni një mandat qeverisës duke censuruar kundërshtarët, duke arrestuar oponentët tuaj apo liderin e opozitës… as duke paditur gazetarë që raportojnë lajme!”, deklaroi Vance, duke nënkuptuar se demokracia e vërtetë nuk mund të ekzistojë pa lirinë e shprehjes dhe garën e ndershme politike.

Zëvendëspresidenti amerikan theksoi se demokracia nuk mund të jetë vetëm një parim teorik, por duhet të vihet në praktikë, duke nënvizuar shqetësimin e tij për shtimin e censurës dhe goditjeve ndaj opozitës në vende të ndryshme të botës.

“Unë thellësisht besoj se nuk duhet të keni frikë nga zërat dhe opinionet alternative për atë sesi liderët po drejtojnë shtete të ndryshme evropiane. Fjala e lirë, kam frikë, se po censurohet. E djathta po sulmohet në të gjithë botën”, u shpreh ai para liderëve evropianë të pranishëm në konferencë.

Këlliçi: Rama do të paketohet për tek miku i tij McGonigal!

Deklaratat e Vance kanë ngjallur reagime edhe në Shqipëri. Drejtuesi politik i Partisë Demokratike në Qarkun e Tiranës, Belind Këlliçi, ka ironizuar situatën politike në vend, duke përmendur kryeministrin Edi Rama dhe lidhjet e tij me skandalin McGonigal.

“Dikush ta njoftojë Edi Ramën se ka edhe më keq se Chrisi! Shpejt do paketohet për tek miku i tij McGonigal”, shkroi Këlliçi në rrjetet sociale.

Këto zhvillime vijnë në një kohë kur debati mbi lirinë e medias, pluralizmin politik dhe ndërhyrjet në drejtësi mbetet mjaft i nxehtë në Shqipëri dhe në arenën ndërkombëtare.