Deputetja e Partisë Demokratike, Jorida Tabaku, ka reaguar pas arrestimit të kryetarit të Bashkisë së Tiranës, Erion Veliaj, duke e cilësuar si një moment të shumëpritur nga qytetarët dhe një hap të madh drejt çmontimit të një sistemi të korruptuar.

“Është një lajm që qytetarët e kanë pritur shumë, duke ditur skemën kriminale që ka funksionuar në Bashkinë e Tiranës. Kjo skemë është reflektuar në çështjen e inceneratorëve, në aferën 5D dhe shumë të tjera. Arrestimi i Veliajt është çmontimi i sistemit korruptiv që ai kishte ndërtuar.”, tha Tabaku.

Ajo gjithashtu përmendi një sërë akuzash të mëparshme ndaj Veliajt, duke përfshirë kapjen e mediave dhe rastin tragjik të Ardit Gjoklajt, si pjesë e një sistemi ku sipas saj, korrupsioni ishte i rrënjosur thellë.

Tabaku: Ka qenë një ditë e bukur kur Veliaj u arrestua

Deputetja demokrate nuk e fshehu kënaqësinë që drejtësia më në fund ka vepruar ndaj një prej figurave kryesore të qeverisjes vendore.

“Ka qenë një ditë e bukur kur Veliaj ka shkuar në SPAK. Ka qenë një ditë e mirë kur ai u burgos. Nuk është çështje gëzimi, por askush nuk mund të jetë mbi ligjin. Duhet të kemi frikë nga ligji.”, u shpreh ajo.

Tabaku kritikoi protestën e organizuar në mbështetje të Veliajt, duke thënë se aty morën pjesë njerëz të paguar nga bashkia, të cilëve u është prekur burimi i të ardhurave.

Besim dhe skepticizëm për SPAK-un

Duke folur për institucionin që mori këtë vendim, SPAK, Tabaku tha se brenda tij ka prokurorë të aftë dhe me integritet, por nuk mungojnë as ata që nuk janë në nivelin e duhur.

“Në SPAK ka prokurorë me integritet, por ka edhe njerëz që nuk kanë integritet mjaftueshëm. Për çështjen Veliaj, SPAK meriton përgëzime maksimale.”, deklaroi ajo.

Thirrje për qeverisje të pastër dhe moral në politikë

Deputetja demokrate theksoi se qeverisja e sotme ka degraduar, ndërsa PD-ja duhet të paraqesë një ofertë të qartë për qytetarët si alternativë ndaj qeverisjes aktuale.

“Sistemi korruptiv është arsyeja kryesore pse Shqipëria ndodhet në këtë gjendje. Kushdo që ka afera korruptive, duhet të shkojë përpara drejtësisë. Politika duhet të ketë një standard moral dhe të refuzojë korrupsionin.”, tha ajo.

Tabaku gjithashtu kritikoi qeverinë për mbrojtjen e zyrtarëve të saj deri në momentin kur bëhen të pambrojtshëm, duke e cilësuar si një sjellje që tregon degradimin e qeverisjes.

“Maxhoranca mbron çdokënd, derisa bëhet i pambrojtshëm. Opozita duhet të tregojë ofertën më të mirë që qytetarët ta votë-besojnë.”, përfundoi ajo.

Arrestimi i Erion Veliajt shënon një pikë kthese në politikën shqiptare, me një përballje të fortë mes qeverisë, opozitës dhe drejtësisë. A do të ketë të tjera zhvillime? Mbetet për t’u parë…