Jonida Maliqi ka ndarë me publikun një nga momentet më të vështira të jetës së saj, duke folur hapur për kohën kur u përball me frikën se djali i saj, Dani, mund të ishte ndryshe nga fëmijët e tjerë.

E ftuar në emisionin “Mirëmbrëma Yje”, këngëtarja e përshkroi atë periudhë si dramën më të madhe që ka përjetuar ndonjëherë, duke pranuar se mungesa e informacionit dhe pasiguria e bënë të ndihej e humbur.

“Ka qenë një moment ku më është dashur të përballem me një situatë që ishte drama e jetës sime. Ku supozohej që Dani ishte ndryshe nga fëmijët e tjerë. Kjo ishte një situatë që mendova se nuk kishte shpresë, por e kisha shumë gabim. Nuk kisha informacion. Nuk dita ta përballoj për momentin,” u shpreh ajo.

Rrëfimi i saj vjen si një dëshmi e fortë për presionin emocional që mund të përjetojnë prindërit në situata të tilla, por edhe për forcën që gjendet me kalimin e kohës. Sot, perspektiva e Jonidës ka ndryshuar rrënjësisht.

Duke folur për djalin, ajo e cilësoi atë si dhuratën më të madhe të jetës së saj dhe burimin e një dashurie të pakushtëzuar:

“Mua më ka bekuar Zoti me Danin. Unë kam një fëmijë që më jep dashurinë që s’do ma jepte askush në botë dhe jam shumë e lumtur.”

Rrëfimi i këngëtares sjell një mesazh të fortë mbi rëndësinë e informimit, mbështetjes dhe pranimit, duke treguar se edhe periudhat më të errëta mund të shndërrohen në burim force dhe drite.