Ish-banori i “Big Brother VIP”, Joz Marku, ka reflektuar mbi një nga momentet më të debatueshme të edicionit të kaluar — shpullën ndaj Gjestit gjatë daljes së tij nga shtëpia. Në një intervistë për “n’Kosovë Show”, Jozi shprehu pendesë të thellë për incidentin, duke e cilësuar si një veprim që nuk e nderon.
“Patjetër që ndihem keq. Nuk gjej fjalë ta përshkruaj apo ta sqaroj. Ka njerëz që e kanë përjetuar shumë keq përtej ekranit. Shkurt dhe shqip, është diçka që nuk më bën aspak krenar,” u shpreh ai.
Marku theksoi se reagimi i tij ishte i nxitur nga emocionet e momentit: “Reagimet i kemi të ndryshme, emocionet janë shumë të mëdha. Bëjmë gabime, njerëz jemi. Mundesh me gabu.”
Gjatë intervistës, ai shprehu ngushëllime për Gjestin, i cili së fundmi ka humbur vëllain në një aksident tragjik me motor, dhe tregoi se familja e tij nuk e kishte pritur mirë sjelljen në spektakël: “Janë hyrë në vendin e tij, kanë menduar sikur të isha unë në vendin e tij. Shumë e rëndë ndjenja.”
Deklarata e tij vjen si një ndjesë publike për ngjarjen që shkaktoi reagime të shumta dhe ndau publikun mes kritikëve dhe mbështetësve të tij.
