Kandidatja demokrate për presidente, Kamala Harris, ka zhbërë avantazhin e rivalit republikan, Donald Trump, në pjesën më të madhe të klasës së mesme dhe banorëve të periferive amerikane, duke tërhequr mbështetjen e të ardhurave të mesme. Sipas një sondazhi analitik të kryer nga “Reuters/IPSOS,” Harris ka arritur të marrë drejtimin në këto grupe kyçe që përbëjnë rreth gjysmën e elektoratit amerikan, veçanërisht pas tërheqjes së presidentit Joe Biden nga gara për rizgjedhje më 21 korrik.

Harris ka bërë përparime të dukshme në zonat periferike, të cilat janë multietnike dhe vendimtare në zgjedhjet e 5 nëntorit. Në zgjedhjet e 2020-s, Biden mundi Trump në këto zona me një diferencë prej 6 pikë përqindjeje. Megjithatë, përpara tërheqjes së tij, Trump kryesonte me 43% ndaj 40% ndaj Biden në sondazhet e “Reuters/IPSOS” gjatë muajve qershor dhe korrik.

Harris filloi të ngushtonte hendekun pas nisjes së fushatës së saj në korrik, duke rritur mbështetjen në radhët e votuesve periferikë me një diferencë prej 47% ndaj 41% në favor të saj në sondazhet e kryera në shtator dhe tetor, duke shënuar një lëkundje prej 9 pikësh në favor të demokratëve.

Ndërkohë, edhe në klasën e mesme, Trump ka parë një rënie në mbështetje, duke kaluar nga avantazhi prej 44% kundrejt 37% ndaj Biden, në rënien prej 43% ndaj 45% përballë Harris. Marzhi i gabimit të sondazhit është i ulët, rreth 3 pikë përqindjeje, por rezultatet tregojnë rëndësinë e zonave rurale ku republikanët mbajnë një ndikim të fortë.