Një tjetër goditje ndaj trafikut dhe shpërndarjes së drogave të forta është finalizuar nga Policia e Tiranës, e cila ka arrestuar një 44-vjeçar të dyshuar si furnizues të kokainës në zona të ndryshme të kryeqytetit.

Në kuadër të operacionit policor të koduar “Bulevardi”, u vu në pranga shtetasi me inicialet S. K., 44 vjeç, banues në Vorë.

Sipas Policisë, specialistët e Seksionit për Hetimin e Narkotikëve siguruan informacione se 44-vjeçari do të transportonte dhe shpërndante një sasi të konsiderueshme kokainë në zonën e Bulevardit të Ri dhe në segmentet rrugore që lidhin Tiranën me Urën e Paskuqanit.

Gjatë operacionit, shërbimet policore e lokalizuan dhe e ndaluan për kontroll në rrugën “Riglata”.

Gjatë kontrollit fizik, atij iu gjetën dhe iu sekuestruan dy paketime me lëndë të dyshuar narkotike kokainë, me peshë totale rreth 1 kilogram e 680 gramë.

Nga hetimet paraprake dyshohet se S. K. furnizonte persona të tjerë me kokainë për shitje në doza, ndërsa një pjesë të lëndës narkotike e shpërndante vetë.

Policia bëri me dije se operacioni është vijim i aksioneve të mëparshme kundër trafikut të narkotikëve. Vetëm gjatë fazave të operacionit të koduar “Zonat”, të zhvilluar në muajt maj dhe qershor, janë sekuestruar rreth 1.5 kilogramë kokainë dhe 1.1 kilogramë heroinë.

Hetimet vijojnë në bashkëpunim me Prokurorinë për identifikimin dhe kapjen e personave të tjerë të përfshirë në këtë aktivitet kriminal.

Materialet procedurale i janë referuar Prokurorisë pranë Gjykatës së Juridiksionit të Përgjithshëm Tiranë për veprën penale “Prodhimi dhe shitja e narkotikëve”.