Një 28-vjeçar shqiptar ka përfunduar në prangat e Guardia di Finanza në Parma të Italisë, pasi u kap me mbi 8 kilogramë kokainë, të fshehur me kujdes në makinën që po drejtonte.

Sipas mediave italiane, arrestimi ndodhi pranë kryqëzimit të autostradës në Parma, ku i riu, banues në Langhirano, u ndalua për kontroll rutinë. Gjatë procedurës së identifikimit, ai shfaqi sjellje të dyshimta dhe nervozizëm, çka shtyu efektivët të thellonin verifikimet.

Kontrolli i imtësishëm i automjetit zbuloi një mbulesë tapeti të modifikuar posaçërisht, që nuk përputhej me pajisjet origjinale të makinës. Brenda këtij ndërtimi të improvizuar u gjet sasia e konsiderueshme e kokainës, e cila dyshohet se ishte destinuar për tregun lokal të drogës.

Shqiptari ndodhet tashmë në paraburgim, ndërsa autoritetet italiane kanë nisur hetimet për të zbuluar nëse ai është pjesë e një rrjeti më të gjerë të trafikut të narkotikëve.