Policia e Shtetit ka finalizuar me sukses operacionin policor të koduar “Operacionalja 69”, duke arrestuar në Tiranë shtetasin Oltion Shehu, 49 vjeç, me origjinë nga Tepelena.

Sipas njoftimit zyrtar, Shehu ishte shpallur në kërkim nga autoritetet e Kosovës, pasi Gjykata Themelore e Gjakovës i kishte caktuar në shkurt 2025 masën e sigurisë “Arrest në burg” për veprën penale “Kultivimi i bimëve narkotike”.

Arrestimi u bë i mundur falë bashkëpunimit të ngushtë ndërmjet Policisë shqiptare dhe agjencive ligjzbatuese të Kosovës, në kuadër të shkëmbimit të informacionit operacional.

Interpol Tirana vijon procedurat me autoritetet kosovare për ekstradimin e 49-vjeçarit drejt Gjakovës, ku do të përballet me drejtësinë.