Për shkak të përkeqësimit të kushteve atmosferike, Kapiteneria e Portit të Vlorës ka vendosur ndalimin e pajisjes me leje-nisje të mjeteve të vogla lundruese dhe atyre të peshkimit për një periudhë 24-orëshe.

Sipas njoftimit zyrtar, bazuar në parashikimin hidrometeorologjik detar, moti pritet të përkeqësohet ndjeshëm brenda dhe jashtë Gjirit të Vlorës. Era do të fryjë nga drejtimi jug–juglindje me forcë deri në 6–7 ballë, ndërsa shpejtësia e saj pritet të arrijë nga 15 deri në 25 m/s. Lartësia e dallgëve parashikohet të variojë nga 1.5 deri në 2.5 metra.

Në këto kushte, Kapiteneria ka ndaluar lundrimin e mjeteve të vogla dhe të peshkimit si brenda gjirit të Vlorës ashtu edhe në det të hapur gjatë ditës së sotme dhe asaj të nesërme.

Autoritetet detare u bëjnë thirrje të gjithë subjekteve dhe institucioneve që ushtrojnë veprimtari në fushën e detarisë të bashkëpunojnë dhe të marrin të gjitha masat e nevojshme për sigurimin e mjeteve në port, si dhe për rritjen e gatishmërisë së ekuipazheve, me qëllim parandalimin e çdo situate të rrezikshme.

Ndërkohë, bëhet e ditur se anijet e transportit ndërkombëtar detar do të vijojnë operimin normalisht sipas destinacioneve përkatëse.

Sipas Kapitenerisë së Portit të Vlorës, përmirësimi i situatës hidrometeorologjike pritet më 29 janar, pas orës 06:00, kur do të rishikohet edhe vendimi për mjetet e vogla lundruese dhe ato të peshkimit.