Deputeti i Partisë Mundësia, Erald Kapri, ka ngritur një pikëpyetje të drejtpërdrejtë ndaj Partisë Demokratike, duke kërkuar qartësi nëse opozita do të bashkëpunojë apo jo me kryeministrin Edi Rama për proceset reformuese.

Në deklaratën e tij, Kapri u shpreh se bashkëpunimi për reforma të mëdha është i pamundur me një kryeministër që, sipas tij, qeveris përmes imponimit të shumicës parlamentare dhe kërcënimit me numrat e kartonëve në Kuvend. Ai theksoi se negociatat politike nuk mund të zhvillohen në një klimë presioni dhe arrogance institucionale.

“Dua të kuptojmë, do të bashkëpunohet apo jo me Ramën? Si mund të ulesh me Ramën kur ai të kërcënon dhe thotë ‘kam numrat dhe nuk pyes për ty’? Tani i lutemi Ramës ‘na prit në komision’? Kjo është e pamundur,” u shpreh Kapri.

Deputeti i Partisë Mundësia solli si shembull reformën territoriale të vitit 2015, të ndërmarrë nga qeveria Rama, duke theksuar se pasojat e saj janë të dukshme edhe sot. Sipas tij, pushteti vendor ndodhet në një nga gjendjet më të rënda që ka njohur vendi, si rezultat i një reforme të imponuar dhe pa konsensus real politik.

Kapri theksoi se përballë një kryeministri që përdor shumicën si mjet presioni, çdo tentativë për dialog dhe bashkëpunim për reforma strukturore rrezikon të kthehet në një proces formal, pa garanci për interesin publik dhe demokracinë funksionale.

Deklarata e tij vjen në një kohë debatesh të forta politike mbi reformën territoriale dhe raportet mes mazhorancës dhe opozitës, duke rikthyer në vëmendje pyetjen mbi kufijtë e bashkëpunimit politik në Kuvend.