Në seancën plenare të sotme në Kuvend, Partia Socialiste ka tërhequr nga rendi i ditës projektvendimin që parashikonte ndryshime në përbërjen e Komisionit të Reformës Territoriale. Vendimi u bë publik nga foltorja e Kuvendit nga kreu i grupit parlamentar të PS-së, Taulant Balla.

Gjatë fjalës së tij, Balla deklaroi se mazhoranca ka vendosur heqjen e kësaj pike nga rendi i ditës, pa dhënë sqarime të mëtejshme mbi arsyet apo nëse bëhet fjalë për një shtyrje apo për një rishikim të qëndrimit të socialistëve. Ai theksoi se puna në Komisionin e Posaçëm për Reformën Territoriale do të vijojë.

“E heqim nga rendi i ditës ndryshimet në Komisionin e Reformës Territoriale. Do të vijojë puna në Komisionin e Posaçëm të Reformës Territoriale”, u shpreh Balla në sallën e Kuvendit.

Ky vendim u shoqërua menjëherë me reagime nga opozita. Deputeti i Partisë Demokratike, Luçiano Boçi, e cilësoi të pamjaftueshme heqjen e projektvendimit nga rendi i ditës, duke kërkuar një tërheqje të plotë dhe përfundimtare të ndryshimeve të propozuara.

Sipas Boçit, shtyrja e diskutimit nuk përbën shenjë vullneti politik për konsensus, ndërsa tërheqja e plotë do të ishte sinjal i qartë për respektimin e parimit të bashkëpunimit dhe paritetit në një proces që, sipas opozitës, është trajtuar në mënyrë të njëanshme.

“Duhet të tërhiqeni nga ndryshimet në Komisionin e Reformës Territoriale, jo thjesht ta hiqni nga rendi i ditës. Tërheqja tregon vullnetin, shtyrja nuk tregon asgjë”, deklaroi Boçi.

Debati për Reformën Territoriale mbetet një nga çështjet më të ndjeshme politike, me opozitën që këmbëngul për dialog dhe konsensus të gjerë, ndërsa mazhoranca deklaron se procesi do të vijojë në kuadër të Komisionit të Posaçëm.