Gjykata Kushtetuese, e mbledhur më 6 shkurt 2026, ka marrë vendim për kërkesën e Kryeministrit Edi Rama lidhur me masën e pezullimit nga detyra të zv/kryeministres dhe ministres së Infrastrukturës, Belinda Balluku.

Sipas vendimit, gjyqtarët u ndanë në dy qëndrime, dhe votimi përfundoi 4 me 4, duke mos arritur numrin e nevojshëm prej 5 votash që kërkohet për t’i dhënë të drejtë ankimuesit. Për këtë arsye, vendimi i GJKKO-së dhe SPAK për pezullimin e Ballukut mbetet në fuqi.

Gjyqtarët që votuan kundër kërkesës së Ramës janë: Marsida Xhaferllari, Ilir Toska, Sandër Beci dhe Asim Vokshi.

Gjykata thekson se imuniteti i ministrit nuk është privilegj personal, por ka për qëllim mbrojtjen e funksionit të organit ekzekutiv. Masa e pezullimit prek funksionin politik të ministres dhe për pasojë kërkohet autorizimi paraprak i Kuvendit, sipas interpretimit të disa gjyqtarëve. Një grup tjetër gjyqtarësh e ka konsideruar të ligjshëm pezullimin nga detyra, duke argumentuar se nuk prek mandatin e deputetes, por vetëm funksionin ekzekutiv.

Në përfundim, Gjykata rrëzoi kërkesën e kryeministrit, duke lënë në fuqi pezullimin e Belinda Ballukut. Vendimi hyn në fuqi menjëherë dhe do të shpallet i arsyetuar brenda afateve ligjore.