Autoritetet iraniane kanë arrestuar këngëtaren 27-vjeçare Parastoo Ahmady, pas publikimit të një videoje në kanalin e saj në YouTube, ku ajo këndon pa hixhabin e detyrueshëm për gratë iraniane. Ajo kishte veshur një fustan mbrëmjeje të zi me shpatulla të zhveshura dhe flokët lëshuar, duke kënduar për rreth tridhjetë minuta në një shfaqje live pa audiencë. Data dhe vendi i koncertit online mbeten të panjohura, por videoja është parë më shumë se 1.4 milionë herë.

Performanca e Ahmady-t ka tërhequr mbështetje të gjerë nga fansat e saj, por edhe zemërimin e policisë së moralit, që e ka arrestuar. Avokati i saj ka deklaruar se nuk dihen akuzat kundër saj, as kush e ka arrestuar atë dhe as vendi i paraburgimit. “Unë jam Parastoo, një vajzë që dua të këndoj për njerëzit që dua. Kjo është një e drejtë që nuk mund ta anashkaloja, të këndoj për tokën që dua me pasion”, tha ajo në klipin e saj.

Nga revolucioni islamik i vitit 1979, gratë iraniane janë të detyruara të mbulojnë flokët e tyre dhe nuk lejohen të këndojnë në publik, një politikë që vazhdon të shkaktojë debate dhe protesta në vend.