Deputeti Petro Koçi mbajti një fjalim të ashpër në foltoren e Kuvendit, ku shprehu kundërshtimin e tij ndaj kërkesës së opozitës për shtyrjen e afatit të komisionit hetimor të shëndetësisë. Gjatë fjalimit të tij, Koçi adresoi kritika të forta ndaj opozitës, duke e akuzuar për trajtim çnjerëzor ndaj dëshmitarit Beqaj gjatë dy seancave të fundit.

‘Koha e devizës së diktaturës që ra në ’97, se humanizmi është tolerant ndaj armikut, ka vdekur. E papranueshme është fyerja e dinjitetit të dëshmitarit që thirrëm. Niveli i akuzës ishte përtokë. Mjerë Shqipëria nëse SPAK do të kishte nivelin hetimor të komisionit që sot mbyll punimet. Mjerë akuza dhe korrupsioni me standardet jo profesionale që u menaxhua nga kryeprokurorja. Keni dështuar dhe dështimi është i juaji. Dështuar me sukses.’

Koçi vijoi duke theksuar se, sipas tij, opozita kishte vendosur të mos zhvillonte më dëgjesa me dëshmitarë pasi e kuptoi se përpjekjet e saj po shkonin drejt dështimit. Ai akuzoi opozitën se për tri ditë rresht kishte bërë vetëm konferenca për shtyp, duke sugjeruar se ndikimi i tyre ishte minimal.

‘Deri mbrëmë vetëm një njeri ju dëgjonte. Shumëzoni sa kulla ka ndërtuar dhe sa kate ka në secilën kullë,’ përfundoi Koçi, duke nënvizuar se përpjekjet e komisionit hetimor kishin dështuar me standarde të pamjaftueshme profesionale.