Prokuroria e Shkodrës i ka dërguar Ministrisë së Drejtësisë materialet e dosjes së Ibrahim Licit, bashkë me kërkesën për ekstradimin e tij. Lici u arrestua në Turqi nga autoritetet lokale, pasi ishte i lidhur me vrasjen e Endri Mustafës, për të cilën ishte shpallur në kërkim ndërkombëtar. Familjarët e Licit pretenduan se ai u vetëdorëzua në Turqi.

Ministria e Drejtësisë pritet të drejtohet zyrtarisht tek shteti turk për të kërkuar ekstradimin e Licit. Gjykata e Shkodrës kishte caktuar masën e sigurisë “Arrest në burg” për Licit, për veprat penale të vrasjes me paramendim dhe mbajtjes pa leje të armëve shpërthyese dhe municionit.

Informacionet për vendndodhjen e tij në Turqi u siguruan nga agjentët e antikrimit në Shkodër, dhe pas bashkëpunimit me Interpolin dhe autoritetet turke, Lici u arrestua në operacionin policor të koduar “Jehona”. Megjithatë, vëllai i tij, Hamza Lici, thotë se Ibrahim nuk u arrestua, por u vetëdorëzua në Turqi për të kërkuar azil, duke pretenduar se nuk ndihet i sigurtë në Shqipëri dhe se është i pafajshëm për vrasjen e Mustafës.

Në lidhje me vrasjen, një tjetër person, Ergys Malja, është dënuar me 10 vite burg. Prokuroria kishte kërkuar 12 vite burg për Maljan për shkak të moshës së tij të mitur.ia