Në provincën italiane të Emilia-Romagna, vazhdojnë kërkimet për dy persona të zhdukur pas përmbytjeve të shkaktuara nga reshjet e dendura të shiut. Autoritetet njoftuan se pothuajse 1,500 banorë janë evakuuar nga qyteti i Banjakavalit dhe një paralajmërim i kuq është në fuqi për kushtet ekstreme të motit, që pritet të vazhdojnë deri në mbrëmjen e sotme.

Zona e goditur përfshin qytetet Bolonja, Cesena, Forli, Ravenna dhe Rimini, ku janë regjistruar rrëshqitje të shumta të dheut. Shkollat janë ende të mbyllura në Ravenë dhe në disa zona përreth Forli-Cesena.

Emilia-Romagna ka pasur një përvojë të ngjashme në maj 2023, kur përmbytjet dhe rrëshqitjet e dheut shkaktuan vdekjen e 17 personave dhe dëme disa miliardë euro. Tani, shumë zona që u preken dje nga reshjet e dendura kanë pësuar përmbytje edhe më parë.

Përveç kësaj, reshje të dendura shiu kanë goditur edhe rajonin Marche, veçanërisht qytetin e Ankonës, ku lumi ka dalë nga shtrati. Në Toskanë, zona veriore e Mugello është në alarm, pasi disa rrugë provinciale u mbyllën për shkak të rrëshqitjeve të dheut.