Mëngjesin e sotëm, Kosova u përball me një rast tragjik në një hotel në komunën e Graçanicës, ku dyshohet se Artila Kameri, një sipërmarrëse 34-vjeçare nga Gjakova, humbi jetën pas një rënieje nga kati i dytë i hotelit. Zëdhënësja e policisë për rajonin e Prishtinës, Flora Ahmeti, konfirmoi ngjarjen dhe informoi se autoritetet po kryejnë hetimet e nevojshme.

Kameri ishte një figurë e njohur, fituese e vendit të katërt në kampionatin botëror të estetikës në Napoli, Itali.

Sipërmarrësja gjithashtu ishte e njohur për sallonin estetik në Gjakovë dhe kishte krijuar një partneritet të suksesshëm me El Nails Company si distributore për Kosovë. Familja dhe shoqëria janë në tronditje nga humbja e saj e papritur.

Kush është Artila Kameri?

Artila Kameri është një sipërmarrëse nga Gjakova e cila kishte në pronësi një sallon estetik në Gjakovë.

Pak më shumë se një muaj më parë, 34-vjeçarja kishte ndarë një pjesë të intervistës së saj në televizionin publik, ku ishte ftuar pasi kishte fituar vendin e katërt në kampionatin botëror të estetikës të mbajtur në Napoli të Italisë.

“Kete sukses ja kushtoj vetes. Mua, qe dite pas dite gjej kurajon per tu perballur me sfidat, mua qe gjthmone e kam gjetur forcen per te ecuar perpara. Mua, qe pavaresisht te gjthave, ja dal te jem gjithmone vetvetja”, shkruante e ndjera, Artila Kameri.

Në të njëjtin postim, ajo kishte njoftuar se ka krijuar partneritet me El Nails Company, ku ishte zyrtarizuar si distributore e këtyre produkteve për Kosovë.