Kandidati i Koalicionit PD-ASHM në Qarkun e Beratit, Lefter Maliqi, është shpallur si kandidati më i votuar i së djathtës nga diaspora, duke grumbulluar 421 vota preferenciale pas numërimit të votave jashtë vendit.

Në një reagim të shpërndarë në rrjetet sociale, Maliqi u shpreh thellësisht mirënjohës ndaj mbështetjes që ka marrë, duke e cilësuar këtë si një votë me zemër, të lirë dhe pa ndikime.

“Diasporë, mirënjohje e thellë! Jam i pari – kjo është një votë me zemër, pa imponim, pa vajtur asnjëherë jashtë vendit. Kjo është një votë pa ndikim, pa orientim, por e drejtëpërdrejtë. Përulem para jush me zemër! Së bashku do ja dalim, me besim në Zot! Ju faleminderit!”

Maliqi ka qenë një zë aktiv i opozitës në Berat dhe këtë rezultat e sheh si një konfirmim të besimit që diaspora ka tek ai dhe alternativa që përfaqëson.