Shefi i organizimit në Partinë Demokratike, Klevis Balliu, ka reaguar ashpër përmes një postimi në Facebook lidhur me situatën e fondeve të Bashkimit Europian për Shqipërinë.

Balliu akuzon qeverinë e kryeministrit Edi Rama si pengesën kryesore për integrimin e vendit në BE, duke pretenduar se fondet europiane rrezikojnë të shpërdorohen për shkak të korrupsionit.

“BE i pret fondet Shqipërisë – arsyeja: qeveri e korruptuar dhe e inkriminuar! Me Ramën nuk ka as integrim, as para. Bashkimi Europian nuk i beson më kësaj qeverie, sepse fondet rrezikojnë të vidhen, jo të shkojnë te qytetarët. Kjo është prova që qeveria e sotme është pengesë për Europën dhe ndihmë vetëm për hajdutët”, – shkruan Balliu.

Sipas tij, qytetarët shqiptarë mbeten pa përfitime, ndërsa “hajdutët” përfitojnë nga pushteti.

Deklarata e Balliut vjen në një kohë kur çështja e fondeve dhe integrimit europian të Shqipërisë është rikthyer në qendër të debatit politik.