Prej dy ditësh, 29-vjeçari Ardit Beshiri rezulton i humbur pas një ngjarjeje tragjike në zonën e Qafë-Burrelit, në Klos, ku një rezervuar uji pranë fabrikës së përpunimit të kromit është çarë, duke përmbytur zonën përreth.

Familjarët e të riut kanë ngritur alarmin dhe kërkojnë ndërhyrje urgjente të institucioneve shtetërore, duke theksuar se gjetja e trupit është e pamundur pa aparatura të posaçme. Kushëriri i tij, Mevlan Taraj, tha për mediat se terreni i thyer ka penguar kërkimet me mjete tradicionale, ndërsa theksoi se vullnetarët, disa ushtarë dhe efektivë policie janë të vetmit që po përpiqen ta gjejnë trupin.

“Ka një kompani turke që mendohet se ka aparaturat për të gjetur trupin, por nuk e dimë emrin. Kemi dëgjuar se një rast i ngjashëm është zgjidhur në Vaun e Dejës me ndihmën e tyre,” u shpreh Taraj.

Ndërkohë që shpresa për gjetjen e 29-vjeçarit bie çdo orë, familja është e tronditur dhe apelon që shteti të mos qëndrojë spektator në një dramë që mund të prekë çdokënd. Kërkimet vijojnë me vështirësi në një terren ku makineritë nuk mund të depërtojnë.