Në Ditën e Dëshmorëve, Presidenti i Partisë së Lirisë, Ilir Meta, ka ndarë një mesazh reflektues dhe apelues për të nderuar kujtimin e mijëra martirëve që dhanë jetën për lirinë e Shqipërisë.
“Sot është dita e kujtimit të amanetit të Martirëve, për të ndërtuar një Shqipëri të begatë, të drejtë dhe europiane për të gjithë shqiptarët”, shkruan Meta në postimin e tij, duke i cilësuar 5 Majin si një ditë të madhe kujtese dhe frymëzimi.
Në mesazhin e tij, Meta thekson rëndësinë e mbrojtjes së Lirisë, Sovranitetit dhe Pavarësisë, duke paralajmëruar vigjilencë ndaj çdo uzurpatori, pavarësisht formës që ai mund të marrë.
“5 Maji është dhe do të mbetet një ditë madhore kujtese dhe nderimi për mijëra e mijëra shqiptarë patriotë dhe të rinj që nuk kursyen as jetën për Atdheun,” shprehet kreu i Partisë së Lirisë.
Në këtë ditë përkujtimore, krerët shtetërorë janë përulur para monumentit “Nëna Shqipëri”, ndërsa edhe Ambasada e SHBA-së ka shpërndarë një mesazh të zv/presidentit amerikan Vance, duke theksuar lirinë e qytetarëve dhe rëndësinë e mosfrikësimit prej tyre.
“Lavdi të përjetshme Dëshmorëve të paharruar të Atdheut!” – mbyllet mesazhi i Ilir Metës në këtë ditë të shënuar.
