“Koha të reflektojmë dhe të prodhojmë një politikë që i shërben procesit të integrimit”.

Kështu shkroi Jorida Tabaku në faqen e saj zyrtare në FB, duke thënë se merita për konferencën e parë ndërqeveritare i shkon dhe opozitës që ndërmori hapa konkretë për anëtarësimin e vendit në NATO që në fillim të viteve 1990.

Sipas saj, në 8 vite qeverisje opozita ka ndërmarrë hapa të rëndësishëm në këtë proces dhe duhet të ishte ftuar në tavolinën europiane.

“Megjithëse BE ka provuar sa ka qenë pranë nesh sa herë që ne kemi kërkuar ndihmë madje edhe duke e ditur se si qeveria jonë i menaxhon ndihmat, si fjala vjen për tërmetin apo pandeminë. Pa folur për projektet infrastrukturore që jo rrallë janë nënvlerësuar nga një qeveri që shpërdoron shumë dhe jep llogari pak”, shkroi Tabaku.

“Si kryetare e Këshillit Kombëtar të Integrimit do të fokusoj punën dhe rolin e këshillit në mbikëqyrjen e këtij procesi, në kontrollin e monitorimin e strukturave. Pasi do të ishte e udhës që parlamenti shqiptar të merrte gjithnjë e më shumë funksione dhe pushtet në dorë në lidhje me këtë proces që nuk është pronë e asnjë force politike përpos e forcës së shqiptarëve për me qenë pjesë e BE-së”, shtoi ajo.