Komisioni i Shëndetësisë ka vijuar me debate, ku krahas rendit të ditës, kanë shpërthyer akuza nga ana e Partisë Demokratike drejtuar mazhorancës.

Kryetarja e komisionit, Albana Vokshi, ka deklaruar se nga sistemi i patronazhistëve, 70 prej tyre janë nënpunës së Ministrisë së Shëndetësisë. Sipas saj, kjo tregon qartazi se patronazhistët u përdorën për fushatë zgjedhore.

Nënkryetarja e komisionit, Klodiana Spahiu tentoi disa herë të ndërpresë Vokshin, e cila vijonte me tone të larta. Spahiu tha se kjo është mënyra më e shëmtuar për të drejtuar komisionin, ndërsa Vokshi i është kthyer duke thënë se nuk ia dha të drejtën e fjalës, ndaj nuk duhet të bënte zhurmuesen.

“70 patronazhistë nënpunës të Ministrisë së Shëndetësisë. U përdorën për fushatë. Klodi fike. Fike mikrofonin. Do i themi emër më emër, patronazhistët. 50 mijë patronazhistë. Këta duhet të gjykohen. Jeni mazhorancë ilegjitime. MInistrja duhet të ishte dorëhequr. Është përgjegjësja kryesore që kemi gjithë këto vdekje. Patronazhimi, kush shkonte çonte kura dhe tampone në orën 2 të natës,- tha Vokshi.

“Është mënyra më e shëmtuar të drejtoni komisionet.Po ju tërheq vëmendjen. Të kthehemi në normalitet. Nuk mund ta ktheni në një arenë politike për ju. Kjo të jetë hera e fundit. Kjo që bëni ju nuk ndodh në asnjë komision,- u shpreh Klodiana Spahiu.

“Nuk ta dhashë fjalën. Mbylle mikrofonin. Nuk do lejoj që këtu të bëhet propagandë,- ka perfunduar kryetarja e Komisionit.