Kompania e prodhimit të armëve, KAYO, është regjistruar në Qendrën Kombëtare të Bizneseve më 24 shtator 2024. Ajo është në pronësi të Ministrisë së Mbrojtjes dhe do të drejtohet nga një bord prej 7 anëtarësh, me ish-drejtorin e Përgjithshëm të Policisë së Shtetit, Ardi Veliu, si administrator. KAYO ka një kapital fillestar prej 150 milionë lekësh.

Objekti i veprimtarisë së KAYO përfshin projektimin, prodhimin, riparimin, demilitarizimin, asgjësimin dhe tregtimin e të gjitha llojeve të armëve ose pjesëve të tyre, përfshirë armët ushtarake dhe municionet. Gjithashtu, ajo do të merret me teknologjitë dhe pajisjet ushtarake, uniformat, mjetet, sistemet e armatimit dhe komunikimit, si dhe aktivitete të tjera të lidhura, në përputhje me politikat kombëtare të sigurisë dhe mbrojtjes, si dhe për rritjen e kapaciteteve ushtarake.

Kompania synon të ndjekë interesa ekonomike dhe tregtare, duke forcuar industrinë e prodhimit dhe tregtimit të armëve për të përmbushur nevojat e Forcave të Armatosura dhe strukturave të sigurisë në Shqipëri. Objektivat e saj përfshijnë:

– Prodhimin dhe furnizimin me pajisje të nevojshme për Forcat e Armatosura dhe institucionet përgjegjëse për sigurinë kombëtare.
– Ndërtimin dhe përmirësimin e kapaciteteve vendase për prodhimin dhe furnizimin e armëve.
– Mobilizimin e kapitalit shtetëror dhe privat për zhvillimin e aktivitetit të saj.
– Nxitjen e investimeve në teknologji dhe inovacion në fushën e armëve.
– Bashkëpunimin me subjekte të ndryshme, si shtetërore ashtu edhe private, për zhvillimin e veprimtarisë së saj.

KAYO do të kryejë gjithashtu operacione tregtare dhe financiare që lidhen me aktivitetin e saj, duke përfshirë krijimin e strukturave të tjera sipas legjislacionit në fuqi. Kjo shënon një hap të rëndësishëm për forcimin e industrisë së mbrojtjes në Shqipëri dhe përmirësimin e kapaciteteve të saj ushtarake.