Me kualifikimin e Argjentinës dhe Zvicrës janë përcaktuar tetë kombëtaret që do të luftojnë për një vend në gjysmëfinalet e Botërorit 2026.

Çerekfinalet do të hapen më 9 korrik me supersfidën mes Francës dhe Marokut, e cila do të luhet në orën 22:00. Fituesi i kësaj përballjeje do të përballet në gjysmëfinale me skuadrën që do të dalë triumfuese nga dueli Spanjë-Belgjikë, i programuar për më 10 korrik në orën 21:00.

Në anën tjetër të tabelës, Norvegjia do të sfidojë Anglinë në Miami, në orën 23:00, ndërsa disa orë më vonë, në orën 03:00 të mëngjesit të së dielës, Argjentina do të përballet me Zvicrën për biletën e fundit në gjysmëfinale.

Ndeshjet gjysmëfinale do të zhvillohen më 14 dhe 15 korrik, ndërsa finalja e vogël për vendin e tretë dhe të katërt është planifikuar për më 18 korrik.

Finalja e madhe e Botërorit 2026 do të luhet më 19 korrik në Nju Jork, duke nisur nga ora 21:00, ku do të kurorëzohet kampionia e re e botës.