Komuna e Tetovës ka vendosur që e hëna, 1 dhjetor, të shpallet ditë zie për ndarjen nga jeta të këngëtarit të njohur shqiptar, Shpat Kasapi. Vendimi u mor gjatë një seance të jashtëzakonshme këtë të dielë.

Shpat Kasapi ndërroi jetë të mërkurën në moshën 40-vjeçare, pas një sulmi në zemër, duke lënë pas një trashëgimi të pasur muzikore. Ai dha kontribut të rëndësishëm në zhvillimin e kulturës dhe muzikës në Tetovë, Maqedoninë e Veriut dhe në skenën shqiptare në përgjithësi.

Karriera e tij nisi në fillim të viteve 2000, duke u bërë një idhull për breza të tërë. Hitet e tij, si “Valle Kosovare”, “Kush të ndau prej meje”, “Dashni pa limit” dhe “Aroma e saj”, mbeten të dashura nga publiku i të gjitha moshave.

Komuna e Tetovës theksoi se dita e zisë është një mënyrë për të nderuar veprën dhe kontributin e Kasapit, një figurë kyçe e muzikës shqiptare.