Konfindustria ka vlerësuar se ndërtimi i linjës nënujore të energjisë elektrike Shqipëri – Itali është një hap me rëndësi strategjike për zhvillimin afatgjatë dhe të qëndrueshëm të ekonomisë shqiptare. Administratori i përgjithshëm i Konfindustrisë, Gjergj Buxhuku, theksoi se ky projekt është shumë i rëndësishëm për Shqipërinë, pasi mundëson eksportimin e energjisë elektrike të prodhuar në tregun e pasur të Bashkimit Europian dhe shton mundësitë për investime të mëtejshme nga shtetet arabe në sektorin e energjisë së gjelbër.

Buxhuku shtoi se përfitimet nga ndërtimi i linjës janë të shumta, duke përfshirë fuqizimin e sigurisë energjitike, ndikimin pozitiv në tregjet financiare dhe rritjen e rëndësisë gjeostrategjike të Shqipërisë. Ai nënvizoi se kjo marrëveshje është një hap i rëndësishëm për Shqipërinë dhe se lidhja me Italinë, përmes linjës nënujore, është një mundësi e shkëlqyer për rritjen e eksportit të energjisë dhe për avancimin e politikave të energjisë të qëndrueshme.

Më 15 janar, u nënshkrua marrëveshja e investimit për ndërtimin e linjës nënujore të shpërndarjes së energjisë mes Shqipërisë, Italisë dhe Emirateve të Bashkuara Arabe. Ky projekt shënon fillimin e realizimit të ndërlidhjes nënujore të Shqipërisë me shtetet e tjera evropiane, duke pasuar lidhjet ekzistuese me Kosovën, Malin e Zi, Greqinë dhe Maqedoninë e Veriut. Lidhja me Maqedoninë e Veriut është aktualisht në fazën e realizimit.