Një ngjarje e rëndë ka tronditur mbrëmjen e së shtunës qytetin e Rrogozhinës, ku një konflikt mes dy fqinjëve ka përfunduar me humbjen e jetës së një 60-vjeçari. Si pasojë e përleshjes me mjet prerës, ka mbetur i vdekur Rrapush Memolla, ndërsa autori i dyshuar është arrestuar nga policia.

Sipas informacioneve paraprake, ngjarja ka ndodhur rreth orës 21:50 në lagjen “Mollaj”. Dyshohet se pas një konflikti, 25-vjeçari Meklan Meçe ka goditur me thikë fqinjin e tij, Rrapush Memolla.

Menjëherë pas njoftimit, shërbimet e policisë kanë mbërritur në vendngjarje, duke bërë të mundur identifikimin dhe arrestimin e të riut. Pavarësisht ndërhyrjes së shpejtë, 60-vjeçari nuk ka mundur t’u mbijetojë plagëve të marra dhe ka ndërruar jetë.

Ndërkohë, autori i dyshuar ka pësuar dëmtime të lehta në dorë gjatë përleshjes.

Nën drejtimin e Prokurorisë, grupi hetimor vijon veprimet për të zbardhur plotësisht rrethanat dhe shkaqet e ngjarjes së rëndë.