Një raport i publikuar nga inteligjenca ushtarake e Koresë së Jugut ka nxjerrë në pah përmasat e mbështetjes që Koreja e Veriut i ka dhënë Rusisë në luftën kundër Ukrainës. Sipas të dhënave të bëra publike nga agjencia koreano-jugore Yonhap, Pheniani i ka dërguar Moskës më shumë se 12 milionë fishekë me predha artilerie kalibri 152 mm, të destinuara për përdorim në frontin e luftës në Ukrainë.

Raporti, i paraqitur nga Agjencia e Mbrojtjes së Seulit një politikani të opozitës, vjen vetëm një ditë pasi lideri koreano-verior Kim Jong Un premtoi mbështetje “pa kushte” për luftën e Rusisë, gjatë një takimi zyrtar me ministrin e Jashtëm rus, Sergei Lavrov.

Jo vetëm armë, por edhe trupa

Përveç mbështetjes logjistike dhe ushtarake me municion, Koreja e Veriut ka dërguar edhe rreth 10,000 ushtarë në territorin rus, të cilët sipas burimeve ndërkombëtare, po angazhohen drejtpërdrejt në konfliktin me Ukrainën. Raportet sugjerojnë se një pjesë e tyre janë kapur rob lufte, duke rritur shqetësimet globale për përfshirjen e shteteve të treta në luftë.

Presidenti ukrainas Volodymyr Zelensky ka reaguar ashpër ndaj këtij zhvillimi dhe i ka bërë thirrje Kinës që të ushtrojë ndikimin e saj për t’i dhënë fund kësaj mbështetje ushtarake ndaj Rusisë nga aleatët e saj autoritarë.

Një aks i rrezikshëm

Lidhja gjithnjë e më e ngushtë midis Rusisë dhe Koresë së Veriut shihet me shqetësim nga perëndimi. Transferimi masiv i municioneve dhe trupeve mund të ndikojë ndjeshëm në përshkallëzimin e konfliktit në Ukrainë, duke shtuar edhe më shumë presion ndaj shteteve të NATO-s për të rritur mbështetjen për Kievin.

Ekspertët paralajmërojnë se mbështetja ushtarake nga Koreja e Veriut është një precedent i rrezikshëm, që mund të ndryshojë balancat në konfliktin ruso-ukrainas dhe të zgjerojë përmasat gjeopolitike të luftës.