Kosova do të aplikojë sërish për të marrë statusin e vendit anëtar me të drejta të plota në Asamblenë Parlamentare të Frankofonisë (APF), ka njoftuar kryeministri Albin Kurti. Ai tha se kjo mundësi do të jetë e hapur në samitin e asamblesë që do të mbahet në vitin 2026. Kurti, në seancën solemne të hapjes së sesionit të 36-të të Asamblesë Rajonale të Evropës (ARE), pjesë e APF-së, që po zhvillohet në Kosovë, theksoi nevojën që bota frankofone të jetë më e pranishme në vend.
Aktualisht, Kosova është anëtare e asocuar në APF, ndërsa për të arritur statusin e plotë, asambleja merr parasysh vlerësime politike që lidhen me marrëdhëniet e mira fqinjësore. Kosova kishte aplikuar për t’u bërë anëtare në vitin 2018, por ajo kërkesë nuk pati sukses. Kurti theksoi gjithashtu se nuk mund të ketë demokraci të vërtetë pa trajtimin e manipulimit të informacionit dhe sulmeve kibernetike, duke e cilësuar këtë si një nga temat kyçe të samitit.
Në anën tjetër, kryetari i Kuvendit të Kosovës, Glauk Konjufca, tha se vendi do të synojë të forcojë lidhjet kulturore dhe gjuhësore me vendet frankofone dhe përmendi mbështetjen që Asambleja Parlamentare e Frankofonisë kishte shprehur për sulmin terrorist serb të vitit të kaluar në Banjskë të Zveçanit. Kryesuesja e delegacionit të Asamblesë Rajonale të Evropës, senatorja belge Anne Lambelin, theksoi se qëllimi i asamblesë nuk është imponimi i demokracisë, por mbrojtja e saj.
Po ashtu, Dimal Basha, kryesues i delegacionit të Përhershëm të Kuvendit të Kosovës në APF, deklaroi se Kosova do të angazhohet për të mbrojtur dhe promovuar demokracinë dhe të drejtat e grave.
