Sot, më 17 shkurt 2026, Kosova shënon 18 vjetorin e shpalljes së Pavarësisë. Më 17 shkurt 2008, pas një rrugëtimi të gjatë dhe të dhimbshëm, vendi u bë zyrtarisht shtet i pavarur dhe sovran.

Pas përfundimit të luftës në qershor 1999 dhe largimit të forcave serbe nga territori, Kosova u vendos nën administrim ndërkombëtar të UNMIK-ut, ndërsa institucione demokratike si Kuvendi, Presidenti dhe qeveria filluan të funksionojnë gradualisht. Në këtë periudhë, Serbia nuk kishte kontroll mbi vendin, por në Rezolutën 1244 të Këshillit të Sigurimit të OKB-së, Kosova konsiderohej ende juridikisht pjesë e Republikës Federale të Jugosllavisë.

Procesi për statusin përfundimtar nisi në nëntor 2005, dhe më 2 shkurt 2007, i dërguari special i OKB-së, Martti Ahtisaari, dorëzoi propozimin për pavarësi të kushtëzuar, i cili shërbeu si bazë për krijimin e shtetit të pavarur. Pas disa raundeve të bisedimeve, Kosova shpalli pavarësinë më 17 shkurt 2008 në orën 15:39 në Kuvendin e Republikës së Kosovës në Prishtinë.

Deklarata e shpalljes së pavarësisë theksonte:

“Ne, udhëheqësit e popullit tonë, të zgjedhur në mënyrë demokratike, nëpërmjet kësaj Deklarate shpallim Kosovën shtet të pavarur dhe sovran. Kjo shpallje pasqyron vullnetin e popullit tonë dhe është në përputhje të plotë me rekomandimet e të Dërguarit Special të Kombeve të Bashkuara, Martti Ahtisaari, dhe me Propozimin e tij Gjithëpërfshirës për Zgjidhjen e Statusit të Kosovës.”

Ky përvjetor vjen si një moment reflektimi mbi rrugëtimin e popullit kosovar dhe sfidat e vazhdueshme për forcimin e shtetit dhe njohjen ndërkombëtare.