Nga 1 dhjetori, qytetarët e Kosovës do të mund të udhëtojnë pa viza drejt ishullit vetëqeverisës të Tajvanit. Zëvendësministri i Punëve të Jashtme dhe Diasporës, Kreshnik Ahmeti, bëri të ditur këtë lajmin përmes një postimi në Facebook, duke theksuar se ky regjimi pa viza do të vlejë për poseduesit e pasaportave të rregullta, diplomatike dhe zyrtare të Kosovës.

Ky zhvillim përbën një hap të rëndësishëm në fuqizimin ndërkombëtar të pasaportës së Kosovës. Sipas Ahmetit, vetëm brenda këtij mandati qeverisës janë arritur marrëveshje për lëvizje të lirë pa viza edhe me Zonën Shengen, Emiratet e Bashkuara Arabe, Tajlandën, Izraelin dhe tani edhe me Tajvanin.

Ahmeti gjithashtu theksoi se ky hap do të mundësojë avancimin e partneriteteve ekonomike, shkëmbimeve në fushën e edukimit dhe bashkëpunimit kulturor me Tajvanin. Ai përmendi gjithashtu se Tajvani ka njohur pavarësinë e Kosovës në shkurt të vitit 2008.

Megjithatë, Kina, e cila nuk e njeh pavarësinë e Kosovës, e konsideron Tajvanin si pjesë të territorit të saj dhe nuk ka përjashtuar mundësinë e përdorimit të forcës për ta marrë ishullin nën kontroll.