Deputeti i Partisë Demokratike, Kreshnik Çollaku, në një intervistë televizive, shprehu shqetësimin e tij për vendimin e mazhorancës socialiste, e cila abstenuan në seancën plenare të djeshme duke refuzuar dërgimin e mandatit të deputetes socialiste, Olta Xhaçka, në Gjykatën Kushtetuese. Çollaku e cilësoi këtë veprim si një arsye për shpërndarjen e Parlamentit, duke e konsideruar një akt të rëndë dhe jo kushtetues.

“Parlamenti nuk mund të degradojë në këtë mënyrë. Ky është një anormalitet që turpëron çdo shqiptar. Në një vend normal, sot duhej të kishte rënë Parlamenti. Ai ka bërë një akt jo kushtetues, duke refuzuar dhe asgjësuar autoritetin e Gjykatës Kushtetuese. Parlamenti ka përdhosur Kushtetutën dhe me votën e PS-së, Republika ka rënë. Kjo është një formë e grushtit të shtetit pa armë,” theksoi Çollaku.

Sipas tij, refuzimi i Parlamentit për të marrë masa në lidhje me një vendim të Gjykatës Kushtetuese është një akt që dëmton rëndë funksionimin e institucioneve demokratike të vendit.

Situata në PD dhe nevoja për unitet në opozitë

Duke folur për situatën brenda Partisë Demokratike, Çollaku theksoi se është e dëmshme për opozitën që të shkojë e përçarë në zgjedhje, duke argumentuar se përçarja do të ishte “vetëvrasje politike.”

“Është e dëmshme që opozita të thërrmohet. Nëse ka ide të ndryshme, nuk shoh ndonjë dramë në këtë, por është thelbësore që opozita të mos shkojë e ndarë në zgjedhje,” deklaroi ai. Çollaku, gjithashtu, shtoi se ka qëndruar brenda grupit të PD-së, duke refuzuar të dalë nga ai, dhe flet bazuar në ndërgjegjen e tij.

Raporti me SHBA-në, thelbësor për PD-në

Çollaku gjithashtu theksoi rëndësinë e raporteve të Partisë Demokratike me Shtetet e Bashkuara të Amerikës, duke i konsideruar ato jetike për partinë. Ai nënvizoi se çdo individ, pavarësisht pozitës, duhet të përballet me drejtësinë në mënyrë të barabartë dhe të drejtë.

“Raporti i PD-së me SHBA-në është jetik. Çdo individ, edhe më i rëndësishmi, duhet të ballafaqohet me drejtësinë pa imunitet. Beteja me drejtësinë kërkon kushte të drejta dhe të barabarta,” përfundoi Çollaku.