Një ngjarje e rëndë ka tronditur opinionin publik në Itali, pasi një vajzë 17-vjeçare është gjetur e vrarë në një kanal në Nizza Monferrato, në provincën e Asti-t. Për krimin dyshohet një 20-vjeçar, i cili është arrestuar nga autoritetet.

Sipas hetimeve paraprake, viktima, e identifikuar si Zoe Trinchero, kishte kaluar mbrëmjen me shoqet në disa lokale të qytetit dhe më pas ishte larguar e vetme. Trupi i saj u zbulua nga një banor i zonës, i cili njoftoi menjëherë policinë.

Ekspertiza fillestare mjeko-ligjore ka evidentuar shenja dhune, trauma në kokë dhe prova që sugjerojnë mbytje. Autoritetet bëjnë me dije se vrasja dyshohet të ketë ndodhur pas një grindjeje.

I arrestuari ishte i njohur i viktimës dhe, sipas burimeve zyrtare, më herët kishte pasur një lidhje sentimentale me të. Pas një marrjeje të gjatë në pyetje, ai ka pranuar autorësinë e krimit para hetuesve.

Hetimet vijojnë për të zbardhur plotësisht rrethanat dhe motivet e kësaj ngjarjeje tragjike, ndërsa komuniteti lokal mbetet i tronditur nga humbja e adoleshentes.