Një ngjarje tragjike ka tronditur Malishevën, ku dy vëllezër, të identifikuar si Naim Morina dhe Driton Morina, janë vrarë me armë zjarri nga dhëndrri i tyre, vetëm pak ditë pasi ishin kthyer nga Zvicra për të marrë pjesë në të pamen e babait të tyre.

Sipas raportimeve nga mediat kosovare, krimi i rëndë ndodhi para shtëpisë së familjes Morina, në një moment kur familjarët ende ishin në ditë zie.

I dyshuari për vrasjen është Astrit Isufi, bashkëshorti i motrës së viktimave, i cili pas ngjarjes është shpallur në kërkim nga policia.

Burime për “Insajderi” kanë treguar se vëllezërit kishin ardhur nga gurbeti vetëm katër ditë më parë, ndërsa konflikti që çoi në tragjedi dyshohet të ketë pasur motive familjare.

Një dëshmitar ka rrëfyer për mediat lokale:

“Kanë ardhur nga Zvicra për t’i bërë babait të pamen, por s’e mendonin kurrë që do të përfundonin vetë në arkivol. Një tragjedi e papërshkrueshme.”
Pamjet nga vendi i ngjarjes tregojnë forca të shumta policore dhe zonën të rrethuar me shirita sigurie, ndërsa banorët e fshatit janë ende të tronditur nga ajo që ka ndodhur.