Një krizë e re diplomatike ka shpërthyer midis Spanjës dhe Izraelit, pas deklaratave të forta të kryeministrit Pedro Sanchez në Parlamentin spanjoll, ku e akuzoi Izraelin për kryerje të gjenocidit në Gaza. Komentet kanë shkaktuar një reagim të ashpër nga autoritetet izraelite, të cilat kanë thirrur ambasadorin spanjoll në Tel Aviv për “qortim diplomatik”.

Ministria e Jashtme izraelite njoftoi të enjten se ambasadori spanjoll do të paraqitet në një takim urgjent në Jerusalem, pas fjalës së Sanchez, që në përgjigje ndaj deputetit republikan Gabriel Ruffian, deklaroi:

“Ne nuk tregtojmë me një shtet që kryen gjenocid. Nuk bëjmë, z. President”.

Kjo deklaratë erdhi pas kritikave të Ruffian për shitjet e armëve të Spanjës drejt Izraelit gjatë ofensivës në Gaza, të cilat qeveria spanjolle i ka mohuar. Por, sipas gazetës El Pais, e cila citon të dhëna zyrtare të eksportit, Spanja ka realizuar 88 dërgesa armësh dhe municionesh në Izrael nga 7 tetori 2023 deri më 31 mars 2025, me një vlerë prej 5.3 milionë euro — pretendime që kryeministri i ka hedhur poshtë si të pavërteta.

Spanja është ndër vendet europiane më kritike ndaj ofensivës izraelite në Gaza dhe Bregun Perëndimor. Qeveria e Sanchez ka ndërmarrë hapa konkretë si anulimi i kontratës për blerje municionesh nga një kompani izraelite dhe zotimi për ndalim të shitjes së armëve në Izrael pas 7 tetorit 2023, datë e fillimit të konfliktit aktual.

Spanja gjithashtu pritet të jetë ndër vendet e para të BE-së që do të njohë zyrtarisht shtetin e Palestinës, duke përshkallëzuar më tej tensionet me qeverinë izraelite të Benjamin Netanyahut. Kjo krizë mund të çojë në një ftohje të mëtejshme të marrëdhënieve diplomatike mes dy vendeve, në një kohë kur konflikti në Lindjen e Mesme vazhdon të polarizojë opinionin ndërkombëtar.