Kryetarja e LSI Monika Kryemadhi priti ditën e sotme Kreun e Prezencës së OSBE në Shqipëri, Ambasador Vincenzo Del Monaco.

Në një postim në rrjetet sociale, Kryemadhi thotë se një ndër temat e diskutimit me kreun e OSBE në Tiranë kanë qenë edhe zgjedhjet e 25 prillit.

Po ashtu gjatë bisedës ajo është shprehur se LSI mbetet e angazhuar për një reformë më të plotë, për një sistem dhe ligj zgjedhor që mundëson barazinë e votës dhe e kthen pushtetin vërtetë në duart e sovranit.

Sipas saj, në këto zgjedhje u dëshmua se “politika shqiptare nuk ka dhënë ende një zgjidhje të plotë e afatgjatë për zgjedhje të lira e të ndershme”.

Kryemadhi bën me dije se e ka falenderuar për rolin pozitiv të misionit për reformat që vendi ka ndërmarrë lidhur me shtetin e së drejtës duke nënvizuar nevojat që Shqipëria ka për përmirësim të vazhdueshëm, drejt një demokracie funksionale, që garanton të drejtat e njeriut dhe biznesit.